Dist l’Escuireil, vos me bleciez,
Bau conpaignon, mar i sachiez,
Volez-vos ma queue esrachier ?
Dist Renart, ainz vos voil mangier
Que je ne puis plus endurer :
En ceste nuit t’estuet finer,
Tu ne pués aler en avant.
Dist Rossel, à Deu me conmant.
Renart tint la coue Rosel
As denz, ne l’en est mie bel ;
De si grant redor l’a sachiée
Que tote li a escorchiée.
Eschapez s’en est à grant peine,
Fuiant s’en vet à grant aleine
Et dit qu’il s’en ira clamer
Au Roi Noble sanz demorer.
Onc ne fina d’esperoner
Tant qu’il aperçut le jor cler.
Droit à la Cort s’en est venu,
Sitost con a le Roi véu
Si se lesse à ses piez chaïr.
Sire, fet-il, fai moi oïr,
Por Deu entent moi à parler.
Quant li Rois voit Rossel plorer,
Moult li anuie, ce sachiez :
Maintenant est levez en piez
Et dit : Rossel, dire poez,
Que vos serois bien escotez.
Page:Le Roman du Renart, 1826, tome 3.djvu/149
Le texte de cette page a été corrigé et est conforme au fac-similé.
