Arriuee de l’Empereur en Nabadonce. Don de Seliſe. Les Princes receus du Roy. Reſponſes de l’Empereur pour les ſept Damoiſelles & auec Sarmedoxe. L’Empereur eſt introduit en l’Hermitage. Vertu du lieu ſur les penſees. Premiere ſeance au Palais de la Lune.
A Nobleſſe arriuoit de toutes parts, tant pour faire honneur à l’Empereur que pour voir les Princes qui auoient eſté ſi longuement perdus, & par le commandement du Roy l’Empereur eſtoit conduit és bōnes villes, où il eſtoit receu auec toute magnificence, & quand il approcha d’Amerimnie le Roy vint au deuant de luy, & ſ’entreſaluerēt ces deux Monarques auec toute courtoyſie & façon de Princes, qui ſ’aimēt ſans feintiſe. Le Roy à l’arriuee honora l’Empereur de tout ce qu’vn grand peut apporter à la reception agreable d’vn autre grand qui le vient voir en amy. L’Empereur eſtant arriué il fut logé au Palais d’Amelie, & ſa chambre fut au pauillon du Querderotrofe, où toutes commoditez luy furent offertes ſelon que le Roy l’auoit ordōné : Les Ambaſſadeurs des Roys & Princes amis eurent audience en ſa preſence. La Court fut incontinant enflee de toutes ſortes de perſonnes qui venoient de toutes parts, & chacun auoit ſon departement, & ſur tout ceux qui ve-
