Comme l’incarnadin eſt la couleur plus belle,
Ainſi eſt mon amour entre les paſſions,
Madame eſt toute belle, & mon cœur tout fidele,
Il part d’vn bel amour & belles actions.
Amour Roy de nos cœurs, ſi tu veux que ma vie
S’oblige à la conſtance, en ſeruant ta grandeur,
Faytant que ma maiſtreſſe en ſa couleur choiſie,
Cognoiſſe les effects de ſes yeux ſur mon cœur.
Gnorise. Amans, preſentez vous, venez, icy deuant l’Empereur deſployer vos deſirs & luy deduiſant l’eſtat de vos amours ſoyez autant fideles au recit de vos auantures, que vous auiez de contentemens eſtans amans bien-aimez. Sire, vous verrez leur geſte, peuples, faictes leur place, & les laiſſez pourmener, car en cet eſtat ils ne penſent plus ny à l’Empereur ny à nous, ils n’ont deſſein ny penſee que ce qu’ils eſtoient alors, en deuiſant & allant comme ils font. Verville. Belle, ſi les grandeurs de vos perfections qui vous deſtournent des petits ſuiets, ne m’euſſent oſté l’aſſeurance, il y a long temps que i’euſſe tenté la fortune, que ie me reſous à ceſte heure de practiquer, vous deſcouuraat l’effort que vos belles graces ont fait ſur mon cœur, qui ne pouuant plus patienter, me force de vous ſupplier, qu’il vous plaiſe m’accepter pour voſtre ſeruiteur. Melisse. Ne me repreſentez point que i’aye tant de perfections ; car elles ſ’eſteindroient en l’inſolente grandeur que vous me feriez conceuoir de moy, qui loing de ceſte oſtentation, deſire eſtre plus innocente que glorieuſe. Verville.
