là demeurent quelque temps pour aucunement eviter la grande ardeur du soleil. Aucunesfois advient que du costé d’un desert prochain, ouquel n’y a que sablons, s’eslevera un Vent ardent & perrilleux. vent si ardent, & vehement, que si les habitans du pays ne se sauvoient à la suyte, ilz seroient de la grande chaleur extainctz & suffoquez, mais si tost qu’ilz apperçoyvent que ce vent commence à s’eslever, incontinent se retirent & cachent es lieux aquatiques, & humides, tant que ce vent ayt faict son cours, & par ce moyen se sauvent de la grande ardeur qui procede de ces desertz sabloneux. De la provient qu’ilz ne font leurs semences qu’au mois de Novembre & la Moissons en Mars. moisson en Mars, auquel temps les autres fruictz sont semblablement venuz à maturité, & sont recueilliz : car apres le mois de Mars toutes les fueilles des arbres & les herbes a cause de la grande chaleur sont incontinent deseichées, tellement que tout le temps d’esté vous n’y trouveriez une seule fueille verte, si ce n’estoit le long des eaues. La coustume du pays est que quand un chef de maison, & pere de famille est decedé, que sa Dueil des femmes veusves. veusve en face le dueil par quatre ans entiers & continuelz, & qu’une fois par chascun jour elle face les pleurs & doleances, & lors s’assemblent en la maison du defunct les parentz & voysins, qui semblablement avec grandz cris & lamentations deplorent sa mort, & en font grandes complainctes.