Euripide dit, en un aultre passaige, que c’est une trèsnoble & trèssouveraine marque entre les hommes d’estre descendu de bonne, noble & ancienne race, à mon advis ne veult il dire que la noblesse du sang doit estre du tout mise en arrière. Aussi, le divin Homère, voulant donner à entendre que certains secrets & incongnus principes & semences de vertus se communiquent aux enfants en la génération, disoit à Thélémac, fils d’Ulysse : « Ô enfant, la vertu de ton père est dans toy instillée », &, pour ceste cause, Platon, en son Alcibiade, juge les natures estre par trop milleures en une noble lignée qu’en une roturière, & lui semble que ceuls qui sont issus de noble sang plus aisément parviennent à la vertu quand ils sont bien nourris & bien institués. Je croy qu’en Mécène, patron & support des bonnes lettres & des gens doctes, les escripvants de son temps ne peurent aulcune chose désirer, car il estoit assés ennobly de vertu, de prudence & d’intégrité des mœurs ; ce néanmoins, il est salué par Ovide Chevalier, descendu d’ancienne ligne de Roys, & a ouy Horace, qui l’appeloit son appuy & refuge, engendré d’ayeuls & bisayeuls Roys.
Il ne sera donc impertinent que nous loueons Marguerite de la trèsancienne & trèsnoble extraction d’où estant descendue, a par ses vertus si haultement eslevé le reng de ses Ancestres & tant illustré leur noblesse & leur splendeur que ne les a seulement ensuivis, mais aussi surpassés.
Et, pour donner à congnoistre à ung chascun combien est noble la lignée de laquelle a esté procréée, sçaichés que Phelippe de Valois, sixiesme de ce nom, engendra Jhean, duquel issit Charles cinquiesme, & de luy vint Charles sixiesme, dont fut procréé Charles septiesme, qui fut père
