de Loys onziesme, duquel descendit Charles huictiesme. Estant iceluy décédé sans hoirs, & défaillant en luy la ligne directe de ceuls de Vallois, il heut pour successeur Loys douziesme, qui fut fils de Charles, Duc d’Orléans, le père duquel, nommé Loys, aussi Duc d’Orléans & fils de Charles cinquiesme avec Charles sixiesme, heut avec luy d’enfants : Jhean, Conte d’Engoulesme, & Philippes, Conte des Vertus. De Jhean nasquit Charles, celuy qui heut à femme Loyse de Savoye, & de ce mariage sortirent Marguerite premièrement &, après elle, François, son frère, depuis Roy.
Quant est aux nobles, vertueux & héroïques faicts de tous ces Roys & Princes, tant, au temps de Paix, en leurs Principautés & Seigneuries, que dehors, en temps de guerre, & de leurs publiques occupations, jaçoit que cest endroit semble requérir que nous en disions quelque chose, affin toutefois que nostre Oraison ne s’égare par trop loing, nous les tairons. Car nous havons entre les mains les Françoises & domestiques Histoires, qui pourront abondamment satisfaire à ceuls qui desireront sçavoir telles choses.
Vous veoiés donc, ô Alençonnois, comment nous sommes du premier degré descendus par ordre aux parents de Marguerite, en sorte que personne ne peut plus ignorer qu’elle soit issue d’Ayeuls, de Bisayeuls & Ancestres non seulement venus de Royalle ligne, mais qui ont aussi possédé & tenu l’autorité & puissance Royalle. Parquoy, si nous devons tenir l’opinion de Simonide pour vraye, lequel nous lisons avoir respondu à un aultre, luy demandant que c’estoit de Noblesse, celuy estre vraiement noble qui est procréé d’Ancestres lesquels ont esté de leur temps amplement & longuement riches, ou que nous adjouxtons
