Qu’impossible est qu’Amour soit ferme,
Combien qu’il le jure & afferme.
Las, ma Fille, il m’a bien menty !
Il me présenta un party,
Au printemps de ma grant jeunesse,
Tel qu’au Ciel n’y avoit Déesse
A qui j’eusse changé mon lieu.
Mon amy j’aymois plus que Dieu,
Et de luy pensoys estre aymée,
Dont de nully n’estois blasmée.
Or voyez que le Temps m’a fait :
Un serviteur si très parfait
Il m’a osté sans nul respit,
Dont j’ay souffert si grand despit
Que, soixante ans ha, le regrette.
Vieille je suis, mais je soubhaicte
Souvent le bien que j’ay perdu.
Mon malheur avez entendu,
Qui de mon cueur n’est arraché ;
Vous n’en aurez meilleur marché,
Car le temps, qui vous faict présent
D’aise & de plaisir à présent,
Ainsi qu’il ha d’Amour le feu
Dans vostre cueur mis peu à peu,
Ainsi peu à peu l’estaindra,
Dont telle doulleur soustiendra
Vostre esperit & vostre corps
Que l’Ame en saillira dehors,
S’elle n’est de Dieu arrestée.
Helas, je vous voy apprestée
De sousfrir autant de tourment
D’amour que de contentement.
