Qui fust venus pur turneier,
Ke Gugemer n’enmaint od sei ;
Cascuns li afie sa fei[1]
K’od li irunt quel part k’il aut,
Mult est huniz qui or li faut.
La nuit sunt au chastel venu,
Si gueréient Mériadu ;
Li Sires les ad herbégiez,
Ki mut en fu joians et liez,
De Gugemer è de s’aïe,
Bien set que la guerre a fenie.
El demain par matin levèrent,
Par les hostex se cunreièrent ;
De la ville issent à grant bruit,
Gugemer devant les cunduit.
Ad castel vindrent si l’assalent,
Mès fors esteit, auprès défalent ;
Gugemer ad la ville assise,
N’enturnera, s’il ne l’ad prise,
Tant li crurent ami et gens,
Ke tuz les afama dedenz.
Le chastel ad destruit è pris,
Et le Seignur dedenz ocis ;
A grant joïe s’Amie enmaine
Mut ont trespassée la paine.
De cest Cunte k’oï avez
Fu Gugemer le Lai trovez,
Qu’hum dist en harpe è en rote,
Boine en est à oïr la note[2].
Page:Marie de France - Poésies, éd. Roquefort, I, 1820.djvu/128
Cette page a été validée par deux contributeurs.
112
LAI DE GUGEMER.
