E revenra en sun présent.
Si sera la Cors enforcie,
Car or ni a fors la maisnie ;
Au Roi revienent li Barun,
Si li mustrèrent la raisun ;
Li Rois a plèges demandez ;
Lanvax fu seus et esgarez.
N’aveit ni parent ni ami,
Gauvains i va qui le plevi,
E tut si cumpaignum après,
E dist li Rois relevuns plès
Sur quanque vus tenez de mei,
Fiés è terres cascuns par sei.
Quant plévi l’unt dunt n’i ot el
Alés s’en est à sun ostel ;
Li Chevalier l’unt cunvéié,
Mut l’um blasmé et castoié,
K’il ne face si grant dolur,
E maudient sa fole amur.
Cascun jur l’aleient véoir,
Pur çou qu’il voleient savoir,
Se il béut, se il mangast,
Mut dutoient que ne s’afolast.
Al jur que il eurent noumé
Li Barun furent asanblé ;
Li Rois é la Roïne i fu
E li Plège unt Lanval rendu.
Mut étoient-il pur lui dolent,
Page:Marie de France - Poésies, éd. Roquefort, I, 1820.djvu/248
Cette page a été validée par deux contributeurs.
232
LAI DE LANVAL.
