Cette page a été validée par deux contributeurs.
306
LAI D’YWENEC.
E puis jà demoure maint jor,
Ainc de cel fait ne l’arêta,
Ne ne destrut, ne ne gueta.
Ses Fix fu nés è bien nurris
E bien gardés è bien servis :
Iwenec le feisoient numer,
Ens el Regne n’avoit sun per,[1]
Si bel, si prou, ne si vaillant,
Si large, ne si despendant.
Quant il fu venus en aé,
A Chevalier l’unt adoubé,
En l’an méïsme que çou fu
Oiiez cum lur est avenu.
A la feste saint Aaron[2]
K’um célébroit à Carlion,
E en plusurs autres cités,
Li Sires avoit esté mandés,
Qu’il i ala od ses amis,
A la custume du païs.
Sa femme è sun fil i menast
E ricement s’aparellast.
Ensi i vint, alé i sunt,
Mais il ne sevent ù il vunt.
Ensamble od eus ot un Mescin
