A sa Dameisele reva,
Dedenz sa chambre la trova :
De part celui l’a salua,
E del’ présent l’a mercia.
Diva, fet-ele, nel’ me céler
Veut-il mei par amurs amer ?
Il li respunt, ceo m’est avis.
Li Chamberlenc n’est pas jolis
Jeo le tienc à curteis è sage,
Qui bien seit celer sun curage :
De vostre part le saluai,
E voz aveirs li presentai.
De vostre ceinture se ceint,
E parmi les flancs bien s’estreint,
E l’anelet mist en son dei,
Ne li dis plus, ne il à mei.
Nel’ reçeut-il pur druerie,
Peot cel estre jeo sui trahie.
Cil li ad dit : par fei ne sai ;
Ore oez ceo ke jeo dirai.
S’il ne vus vosist mut grant bien
Il ne vosist del’ vostre rien.
Tu paroles, fet-ele, en gas,
Jeo sai bien qu’il ne me heit pas,
Unc mès ne li forfis de nient,
Fors tant que jeo l’aim durement,
E si pur-tant me veut haïr,
Dunc est-il digne de murir.
Page:Marie de France - Poésies, éd. Roquefort, I, 1820.djvu/446
Cette page a été validée par deux contributeurs.
430
LAI D’ELIDUC.
