Que tous en fust venus à-val,
Qant au col se pent del’ cheval
Et li Varlets outre s’en passe
Son escu et sa lanche quasse.
Son tour fait, cele part s’adrece,
Et li Chevaliers se redrèce
Au repairier tout prest le trueve
Cascuns de son escu se cuevre
Et il ont traites les espées.
Si se donnent mout grans colées,
Qui de lor escus font astièles
Mais ne widièrent pas les sièles
Mout fut la Mescine effrée,
Qu’adiès regarde la mellée ;
Grant paor a de son ami,
Au Chevalier crie merchi,
Qui à lui a jousté avant,
Que il s’en départist à-tant.
Il fu cortois et afaitiés,
Cele part vint tous eslaisciés ;
D’illuec départi se sont,
L’aighe passent si s’en revont,
Et li Dansiaus plus ne demeure,
Od s’Amie vint énès l’eure,
Paoureuse est desor l’Espine,
Devant soi liève la Meschine.
Le boin cheval en destre enmaine
Or a achevié sa painne :
