Le texte de cette page a été corrigé et est conforme au fac-similé.
434
POÉSIES
Il le reçut par grant amur,
E mult lui dist è sermona
K’il leissast ço ke il pensa ;
Ha ! trop ai grant oppressiun
D’aler en tel perdiciun.
Tant ert fervenz en sun désir
Ne l’en puet li Priurs partir ;
Od lui l’amenad en l’iglise
Si cume costume est assise
Quinze jurs li fist demurer,
Orer, è veiller, è juner.
Quant il out esté quinze dis
Si manda les Clers del’ païs ;
Matin lui firent messe oïr
E escuter tut à leisir,
Puis reçut od dévociun
Le cors Deu od bénéïçun :
L’ewe bénéïte jettèrent
Desur lui, après l’amenèrent
Od létanie, od oreisun,
E od bele processiun,
El liu où il deveit entrer,
Forment le hasta de aler.
Li Priurs ad l’us deffermé :
Devant tuz ad dit è parlé
Al Chevalier ; si lui mustra
