sillon fut filz du vaillant Droon, duc de Bourgoingne, lequel, après la mort du noble empereur Charlemaine, demoura en Espaigne ou il souffry moult de travaulz pour accroistre et augmenter la loy de nostre benoit saulveur Jhesucrist. Et ancoires y estoit il prisonnier aux Sarrazins, si comme aucuns dient, quant la guerre encommença d’entre Charles le Chaulf et monseigneur Gerard. Et la cause pourquoy celle guerre mut d’entre ces deux nobles et puissans princes fut telle. Quant l’empereur Charlemaine fust trespassé, il laissa Loys, son filz, quy tint la monarchie ou empire de Romme, de France et d’Allemaigne. Cestuy empereur Loys, qui fut surnommé (fol. ij) le debonnaire, laissa trois filz après son trespas, c’est assavoir : Lothaire le premier, Loys le second et Charles le Chaulf fut le tiers. Quant Loys leur pere fut trespassé, Lothaire voult tenir toute la monarchie d’Italie, de France et d’Allemaigne, comme avoit fait son pere, et voult assigner ses deux freres Loys et Charles sur autres seigneuries particulieres, de quoy Loys et Charles ne furent pas bien contemps, mais vouloient avoir leur part chascun par soy es seignouries que leur pere avoit possessé.....
(Fol. xlix) Quant le renclus eut entendu l’angle de nostre Seigneur, il obey a son commandement, car lorsque l’evesque, ceulx de l’eglise et le peuple eurent ces paroles ouyes, ilz encommencerent tous par grant devotion a rendre graces a Dieu de ce que ainsi les avoit daigniés visitter. Et lors, a moult grant honneur et reverence, ilz alerent descouvrir le corps saint quy avoit reposé sept ans en ce lieu et le trouverent odourant moult souef et tout entier. Le bon evesque quy de ce lieu le leva, le mist en un trés riche cendal, puis le posa en une noble chasse, et en ce point le porterent a grant honneur et jubilation chantant continuellement hympnes et pseaulmes jusques dedens l’eglise de Poultieres, ouquel lieu leur (vo) vindrent au devant l’abbé dudit lieu de Poultieres, les nobles hommes et le pœuple, et le receurent a trés grant reverence ; et, en chantant pseaulmes devottement a nostre Seigneur, l’enterrerent en icelle notable eglise en ung moult riche sarcus et trés bien ediffié a merveilles, au plus près de madame Berthe, sa femme, sur lequel sarcus est en escript en ung epitaphe son nom et sa vie, c’est assavoir comment il fonda douze eglises, coment il vainquy par douze
