Kui unkes fust a nostre tens.
Or mi otreit Dex grace e sens
Ke ge la puisse si traitier
Que esjoïr e esha[i]tier
S’en puissent tuit cil kui l’osrunt
E kui de cuer l’escuterunt.
Al tens le rei Estiemble avint,
Kui Engleterre a peine tint
E Normendie molement
Tant ku’il la perdi folement,
K’uns chevaliers proz e loials,
Sire Johan li Mareschas,
Qui tant esteit de grant emprise
E de grant ovre e de grant mise
Qu’entor lui out plenté de buens ;
E si n’esteit il mie kuens
Ne baron de trés grant richesce,
Mais tant foisona sa largesse
Ke tute gent s’en merveilloent.
Neïs cil kui point ne l’amoent,
Qui en avoi[e]nt grant envire,
En conveneit souvent bien dire.
Il fu seneschal d’Engleterre, (f. 1 b)
Mais en son tens i out grant guerre
De l’empereriz e del rei,
E tant en dura le desrei
K’en la fin, ce nos est a vis,
Out li reis Estiemble le pis,
20 asjoïr. — 22 cuir. — 28 Il doit y avoir ici une lacune de deux vers, car la phrase reste suspendue.