Cette page n’a pas encore été corrigée
Quar il est de tele nature
Que tos tens sa fueille lui dure :
Vens ne ores, tant ait de force,
N’en abat fueille ne escorce.
Li pins ert deliteus et beaus.
Chanter i venoit uns oiseaus
Deus fois le jor et plus noient,
Et si sachiés a escient
Qu’il i venoit la matinée
Et l’autre fois a la vesprée.
Li oiseaus fu merveilles gens :
Moût seroit grans detriemens
Qui vos en diroit la façon ;
Il estoit mendre d’un moisson
Et pou graindre d’un roietel,
Si chantoit si bien et si bel
Loissignuels, merle, ne mauvis,
Ne l’estorneaus, ce m’est avis,
Chans d’aloe ne de calendre,
N’estoit si plaisans a entendre
Com ert li siens, bien le sachiés.
Li oiseaus fu si afaitiés
A dire lais et noveaus sons
Et rotruenges et chançons
Gigue ne harpe ne viele
