Que ces choſes ſe ſont paſſées.
Depuis que le ſommeil euſt aſſoupy tes ſens,
Par l’ordannance ſouueraine,
Qu’en receut la fameuſe Iſmene ;
Qui fait voir qu’en effet ſes charmes ſont puiſſans.
Mais ſans differer dauantage,
Viens prendre place aupres de moy,
C’eſt le payement de ta foy,
Toy ſeul auras cet auantage.
Apres t’avoir montré les celeſtes palais,
Tu verras encore la place,
Que Diane te fait la grace
De te donner vn iour, apres tant de ſouhaits.
Ha ! Deeſſe, c’eſt trop ; des ſi foibles ſeruices
Se verront ils payez d’eternelles delices ?
Scène QVATRIEME.
A, cher Endymion, au glorieux ſejour,
Que t’a fait meriter ton innoncent amour :
Ne t’estonnes donc plus de tant d’eſtranges choſes,
Car les Dieux vont changer tes eſpines en roſes,
Et ne m’accuſes plus de t’auoir enchanté,
Puiſque ie ſuis l’autheur de sa felicité :
Tes maux ont eſté vains, puiſque ce n’eſt qu’en ſonges[illisible]
Mais enfin tes plaiſirs ne ſeront pas menſonges.
