242. Si tôt que Theodore Lascaris eut nouvelles qu’Andrinople estoit assiegée, et que l’Empereur par necessité remandoit ses gens, ne sçachant auquel aller, ou deçà ou delà, tant il estoit chargé d’affaires, il assembla les plus grandes forces qu’il pût, et s’en vint tendre ses pavillons devant les portes de Squise, où il y eut plusieurs saillies et escarmouches, avec perte de part et d’autre. Puis voyant le peu de gens qui estoient dans la place, prit une partie de son armée, avec ce qu’il pût promptement recouvrer de vaisseaux, qu’il envoya au chasteau de Cibotos, que Guillaume de Sains avoit commencé de fortifier, lequel ils assiégerent par mer et par terre le samedy de la my-caresme. [An 1207]. Il y avoit dedans quarante chevaliers tous vaillans et hardis, dont Machaire de Sainte Manehoud estoit capitaine. Mais la place n’estoit encores achevée d’estre fermée, en sorte que l’on pouvoit venir de plein abord aux mains à coups de lances et d’espées. Les ennemis y donnérent l’assaut par mer et par terre, qui dura tout le samedy le long du jour, ceux de dedans s’estant deffendus courageusement, quoy qu’ils ne fussent que quarante chevaliers contre un si grand nombre d’assaillans ; aussi il n’y en eut que cinq qui ne furent blessez, un d’entre eux nommé Gilles, et neveu de Miles de Brabans, ayant esté tué.
243. Avant que l’on eût commencé cet assaut, le samedy matin arriva un courrier à Constantinople à l’empereur Henry qui estoit à table au palais de Blaquerne, et auquel il tint ces paroles : « Sire, ceux de Cibotos sont étroitement assiegez par mer et par terre ; et si vous ne les secourez promptement ils sont en termes d’estre tous pris ou tuez. » Conon
