et si frere l’oïrent qui tenoient l’ost, si se traistrent arriers, et passérent la montaigne d’autre part devers Nike, et l’Emperéres se logia d’autre part devers Nichomie, en une mult béle praerie, sor un flum per devers la montagne, et fist tendre ses trés et ses pavillons, et fist corre sa gent par le païs, quar il se revelérent quant Tyerris de Los le seneschaus de Romenie ére pris, et pristrent proies assez et prisons. Et ensi séjorna l’emperéres Henris pas cinq jorz en la praerie, et dedenz cel sejor Toldres Lascres prist ses messages, si les envoia à lui, et si le requist qu’il prendroit trive à deux ans, par tel convent que il li laissast abatre Equise et la forteresse del mostier Sainte Sophie, et il li rendroit toz ses prisons qui avoient esté pris à celle desconfiture, et als autres leus, dont il avoit assez en sa terre.
250. Or prist l’Emperéres conseil à ses homes, et distrent que il ne pooient les deux guerres soffrir ensemble, et que mielz valoit cil damages à soffrir que la parte d’Andrenople, ne de l’autre terre, et si auroient parti lor anemis, Johannis le rois de Blaquie et de Bougrie, et Toldres Lascres, qui estoient amis, qui s’entre-aidoient de la guerre. Ensi fû la chose creantée et otroiée. Et lors manda l ’emperéres Henris Pierron de Braiecuel en Equise, et il vint, et fist tant l’emperéres Henris vers lui, que il delivra Equise à Toldres Lascres por abatre, et le mostier de Nichomie. Ensi fu ceste trieve asseurée, et ces forteresces abatues. Tyerris de Los fû delivrés, et les autres prison tuit.
