La concion que feist Gargantua es vaincus.Chap. xlviij.
Oz pères, ayeulx, et ancestres de toute memoyre, ont esté de ce sens & ceste nature, que des batailles par eulx consommées ont pour signe memorial des triumphes & victoyres plus voulentiers erigé trophées & monumens es cueurs des vaincuz par grace, que es terres par eulx conquestée, par achitecture. Car plus estimoient la dive souvenance des humains acquise par liberalité, que la mute inscription des arcs, columnes, & pyramides subiectes es calamitez de l’air, & envie d’un chascun. Soubvenir assez vous peut de la mansuetude, dont ilz userent envers les Bretons à la iournée de sainct Aubin du Cormier : & à la demollition de Parthenay. Vous avez entendu, & entendent admirez le bon traictement qu’ilz feirent es Barbares de Spagnola, qui avoient pillé, depopulé, & saccaigé les fins maritimes de Olone & Thalmondoys. Tout ce ciel a esté remply des louanges & gratulations que vous mesmes & voz pères feistes lors que Alpharbal roy de Canarre non assovy de ses fortunes envahyt furieusement le pays
