À laquelle voix se leverent tous les geans pour le secourir. Mais Panurge leur dist, Messieurs n’y allez pas si m’en croyez : car nostre maistre est fol & frappe à tors & à travers, et ne regarde point où, il vous donnera malencontre.
Mais les geans n’en tindrent contre, voyans que Pantagruel estoit sans baston : & comme ilz approchoient, Pantagruel print Loupgarou par les deux pieds, & du corps de Loupgarou armé d’enclumes frappoit parmy ces geans armez de pierre de taille, & les abattoit comme un maçon faict de couppeaulx, que nul n’arrestoit devant luy qu’il ne ruast contre terre, dont à la rupture de ces harnoys pierreux fut faict un si horrible tumulte, qu’il me souvint, quand la grosse tour de beurre qui estoit à sainct Estienne de Bourges, fondit au soleil. Panurge ensemble Carpalim & Eusthenes ce pendant esgorgetoient ceux qui estoient portez par terre. Faictes vostre compte qu’il n’en eschappa un seul & à veoir Pantagruel sembloit un faulcheur, qui de la faulx (c’estoit Loupgarou) abbatoit l’herbe d’un pré (c’estoient les geans). Mais à ceste escrime, Loupgarou perdit la teste, ce feut, quand Pantagruel en abbatit un, qui avoit nom Riflandouille, qui estoit armé à hault appareil, c’estoit de pierres de gryphon, dont un esclat couppa la gorge tout oultre à Epistemon : car aultrement la plus part d’entre eulx estoient armez à la legiere, c’estoit de pierres de tuffe, & les aultres de pierre ardoysine. Finablement voyant que tous estoient mors, getta le corps de Loupgarou tant qu’il peut contre la ville, & en tombant du coup tua un chat bruslé, une chatte mouillée, une canne petiere, & un oyson bridé.
