Comment Pantagruel explore par sors Virgilianes,
quel sera le mariage de Panurge.
Chapitre XII.
doncqves ouurant Panurge le liure, rencontra on ranc sezieme ce vers.
Nec Deus hunc mensa, Dea nec dignata cubili est.[1]
Digne ne feut d’estre en table du Dieu,
Et n’eut on lict de la Déesse lieu.
Cestuy (dist Pantagruel) n’est à vostre aduentaige. Il denote que vostre femme sera ribaulde, vous coqu par consequent. La Déesse que aurez fauorable, est Minerue vierge tresredoubtée, Déesse puissante, fouldroiante, ennemie des coquz, des muguetz, des adulteres : ennemie des femmes lubricques, non tenentes la foy promise à leurs mariz, & à aultruy soy abandonnantes. Le Dieu est Iuppiter tonnant, & fouldroyant des cieulx. Et noterez par la doctrine des anciens Ethrusques, que les manubies (ainsi appeloient ilz les iectz des fouldres Vulcanicques) competent à elle seulement : exemple de ce feut donné en la conflagration des nauires de Aiax
