Nous n’avons qu’à parler. C’en eſt fait. Quelle joye
D’enlever à l’Epire une ſi belle Proye !
Sauve tout ce qui reſte & de Troye, & d’Hector.
Garde ſon Fils, ſa Veuve, & mille autres encor,
Epire, c’eſt aſſez qu’Hermione renduë
Perde à jamais tes bords, & ton Prince de veuë.
Mais un heureux deſtin le conduit en ces lieux.
Parlons. A tant d’attraits, Amour, ferme ſes yeux.
Scène IV
E vous cherchois, Seigneur. Un peu de violence
M’a fait de vos raiſons combattre la puiſſance,
Te l’avouë. Et depuis que je vous ay quitté,
J’en ay ſenty la force, & connu l’équité.
J’ay ſongé comme vous, qu’à la Grece, à mon Pere,
A moy-meſme en un mot je devenois contraire,
Que je relevois Troye, & rendois imparfait
Tout ce qu’a fait Achille, & tout ce que j’ay fait.
Je ne condamne plus un courroux legitime,
Et l’on vous va, Seigneur, livrer voſtre Victime.
Seigneur, par ce conſeil prudent & rigoureux,
C’eſt acheter la Paix du ſang d’un Malheureux.
