& le clair, elle eſt celle qui recrée plus la veuë ; ce que les autres couleurs ne peuuent pas ſi bien faire, pource qu’elles tiennent des extremitez.
Quant aux Hameçons, dont il eſt parlé cy-deuant, ce ſont les diuers appas qui ſe treuuent dans les voluptez du monde. Mais ces douceurs ſont touſiours meſlées de quelque amertume ; Car il nous arriue enfin que l’homme ſe ſent picqué bien auant des aiguillons de ſa conſcience, & qu’il ne peut toutefois ſe reſoudre à quitter les voluptez paſſageres, qui ſont icy denotées par l’Arc en Ciel, pource qu’elles s’euanoüiſſent en vn inſtant, & n’ont rien de beau que l’apparence.
Predestination. CXXVIII.
L n’eſt point de beauté comparable à cette Vierge,
qui n’a pour cacher ſa nudité qu’vn voile d’argent,
encore paroiſt-elle à moitié nuë. Elle a les yeux
tournez vers le Ciel, qu’elle regarde fixement, la
main droite ſur le ſein, & en la gauche vne Hermine.
La Predeſtination eſt peinte ieune, pour vne marque de ſon Epiſt. ad. Epheſ. Eternité, dont parle ſainct Paul, quand il dit, Qu’auant la creation du monde Dieu nous auoit Predeſtinez à eſtre Saincts.
Elle eſt belle, comme eſtant la meſure & l’idée de toute beauté ; ce qui fait dire à ſainct Thomas, & à ſainct Auguſtin, Lib. de don. Perſe. ad cap. 14 Que la Predeſtination eſt la preparation de la grace pour le preſent, & de la gloire pour le futur.
Le Voile qui la couure eſt d’argent, d’autant que c’eſt vn myſtere caché non ſeulement aux hommes, mais encore aux Anges, & à l’Egliſe meſme : A raiſon dequoy ſainct Paul s’eſcrie ſouuent à ce propos, Que c’eſt vn chemin ſi peu battu, qu’il eſt extremement difficile de le treuuer.
Son action attentiue à regarder le Ciel, monſtre que le Predeſtiné doit marcher par les voyes que Dieu luy a tracées, comme Ieſus-Chriſt l’aſſeure luy-meſme par ces paroles, Ils ne periront point eternellement, & perſonne ne me les oſtera de la main, ce qui doit eſtre entendu des Predeſtinez.
Ce qu’elle porte la main ſur ſa belle gorge, ſignifie que la Predeſtination doit eſtre de grande efficace, non ſeulement en la Preſcience, mais encore en ſes moyens, comme il nous eſt
