Au moins lisez et voyez sur mon front Combien de morts voz beaux sourcils me font : » Le soing caché se cognoist à la face.
MURET [lire BELLEAU]
Beaux sourcils.) Beaux yeux. Il prend une partie pour
l’autre, afin de faire son vers plus doux et sonoreux.
CCVI
Ce jour de May, qui a la teste peinte
D’une gaillarde et gentille verdeur,
Ne doit passer sans que ma vive ardeur
Par vostre grâce un peu ne soit estainte.
De vostre part si vous estes attainte
Autant que moy d’amoureuse langueur,
D’un feu pareil soulageons nostre cœur.
» Qui aime bien, ne doit point avoir crainte.
Le temps s’enfuit, ce pendant ce beau jour
Nous doit apprendre à démener l’amour,
Et le pigeon qui sa femelle baise.
Baisez moi donc, et faisons tout ainsi
Que les oiseaux, sans nous donner soucy :
Apres la mort on ne voit rien qui plaise.
MURET [lire BELLEAU]
Ce jour de May.) Ce Sonet est assez facile, lequel n’a
pas esté fait pour Cassandre, mais pour quelque autre.
