Quand d’un mesme courage
On s’aime ardentement.
Heureux sera le jour
Que je mourray d’amour.
BELLEAU
Douce Maistresse, touche.) Ceste chanson est pleine
de delices et mignardises amoureuses, assez faciles à
celuy qui aura tant soit peu pratiqué la faction d’Amour.
Veux tu que je les baise, Afin de les ouvrir.) Ceste mignar
dise est prise de Properce :
Illa meos somno lassos patefecit ocellos
Ore suo, et dixit, siccine lente jaces ?
LXXIII
En vain pour vous ce bouquet je compose,
En vain pour vous ma Déesse il est fait :
Vostre beauté est bouquet du bouquet,
La fleur des fleurs, la rose de la rose.
Vous et les fleurs differez d’une chose,
C’est que l’Hyver les fleurettes desfait,
Vostre Printemps en ses graces parfait,
Ne craint des ans nulle metamorphose.
Heureux bouquet, n’entre point au sejour
De ce beau sein, ce beau logis d’Amour,
Ne touche point ceste pomme jumelle.
Ton lustre gay d’ennuy se faniroit,
Et ta verdeur sans grace periroit
Pour la chaleur d’une chose si belle.
