serois bien d’avis qu’on usast librement de telle sincope en tous les noms qui se finissent par la voyele, comme espée, et mille autres, pour eviter un mauvais son que ces voyeles, ee, quand elles sont finales, rendent tousjours au milieu d’un vers.
CHANSON
Ma maistresse est toute angelette,
Ma toute rose nouvellette,
Toute mon gracieux orgueil,
Toute ma petite brunette,
Toute ma douce mignonnette,
Toute mon cœur, tout mon œil :
Toute ma Muse, ma Charite,
Toute le gain de mon merite,
Toute mon tout, toute mon rien,
Toute ma maistresse Marie,
Toute ma douce tromperie,
Toute mon mal, toute mon bien :
Toute fiel, toute ma sucrée,
Toute ma jeune Cytherée,
Toute ma joye, et ma langueur,
Toute ma petite Angevine,
Ma toute simple, et toute fine,
Toute mon ame, et tout mon cœur.
Encore un envieux me nie
Que je ne dois aimer m’amie.
Mais quoy ? si ce sot envieux
Disoit que mes yeux je n’aimasse,
Voudriez- vous bien que je laissasse
Pour un sot à n’aimer mes yeux ?
