« Oublié m’ont prélat et pastre[1] ;
« Chascuns m’esloingne,
« A poi[2] lor est de ma besoingne :
« Séjorner l’estuet en Borgoingne[3],
« Mat et confus.
« D’iluec ne se mouvra-il plus,
« Ainz i sera ce seureplus
« Qu’il a à vivre,
« Que jà n’ert nus qui l’en délivre.
« Escorpion, serpent et guivre
« L’ont assailli :
« Par lor assaut l’ont mal bailli,
« Et tuit mi droit li sont failli,
« Qu’il trait[4] avant.
« Il auroit pais, de ce me vant,
« S’il voloit jurer par convant
« Que voirs fust fable,
« Et tors fust droiz, et Diex déable,
« Et fors du sens fussent resnable,
« Et noirs fust blanz ;
« Mès por tant puet user son tans,
« En tel estat, si com je pans,
« Que ce déist,
« Ne que jusques là mefféist,
« Comment que la chose préist ;
« Quar ce seroit
« Desléautez : n’il ne l’ feroit,
« Ce sai-je bien ; miex ameroit
Page:Rutebeuf - Oeuvres complètes, recueillies par Jubinal, tome I, 1839.djvu/115
Le texte de cette page a été corrigé et est conforme au fac-similé.
83
GUILLAUME DE SAINT-AMOUR.
