« Bougres, dist li bons clers, de ce ne te merveille :
Aus oevres Jhésu-Crist nul ne s’apareille ;
Li rosiers ne la flor n’est pas chose pareille :
Voiz la fueille qu’est vers et la flor est vermeille.
« Ne voiz-tu .i. rosier qui n’est ne biaus ne genz ?
Li rosiers est menuz et aspres et poignanz,
Et la flor que il porte n’est pas de tels samblanz,
Ainz est vermeille et bele et mult soef fleranz.
« Bougres, je le te monstre en une autre manière :
Cendre est or une chose qui n’est mie trop chière,
Et si en est li voirres de cendre de feuchière ;
Mauvesement resamble le cendre la verrière.
« Celui Seignor doit l’en et aorer et croire
Qui de si laide cendre fet issir si biau voirre,
Et fet pondre .i. blanc oef une geline noire.
Merveille est comment hom envers Dieu se despoire. »
Or i a autres bougres si de Dieu mescréant
Qu’il ne cuident mie que Diex soit si poissant.
Quant li mors est poris, qu’en autre tel semblant
Le puisse Diex refère comme il estoit devant.
E, bougres desloiaus, mescréanz, que dis-tu ?
I. pommier et .i. arbre sera de flors tout nu :
Dedenz quart jor après sera vert et foillu.
Plus se merveilleroit qui ce auroit véu
Qu’il ne feroit d’un mort s’il estoit revescu.
Quant on taille la vingne, voiz que n’i pert noient ;
Il ne demeure mie après trop longuement
Qu’ele est vers et foillue et li roisins i pent :
Nus ne porroit ce fère fors que Diex seulement.
Et se la vingne targe .xv. jors ou .i. mois,
Ausi la feroit Diex carchier tot demanois,
Et auroit confondues les genz de toutes lois
Mors et resuscitez ainz c’on éust dit .iij.
En tant que l’en auroit sa main close et ouverte
Auroit Diex paienie confondue et déserte,
Page:Rutebeuf - Oeuvres complètes, recueillies par Jubinal, tome I, 1839.djvu/435
Le texte de cette page a été corrigé et est conforme au fac-similé.
403
ET ÉCLAIRCISSEMENTS.
