Page:Rutebeuf - Oeuvres complètes, recueillies par Jubinal, tome I, 1839.djvu/449

417

ET ÉCLAIRCISSEMENTS.

Cil qui ne s’i vodront aerdre
La vie lor convendra perdre.
Les gens encontre eus esmovrons
Par les baraz que nous covrons,
Et les ferons desglavier
Ou par autre mort devier,
Puisqu’ainsinc est escript ou livre
Qui ce raconte et segnefie :
Tant cum Pierres ait seignorie,
Ne puet Jehans monstrer sa force.
Or vous ai dit du sens l’escorce
Qui fait l’entencion repondre ;
Or vous en voeil la moele espondre.

Par Pierre voit le pape entendre,
Et les clers séculiers comprendre
Qui la loi Jhésu-Crist tendront,
Et garderont et desfendront
Contre trestous empescheors,
Et par Jehan les prescheors
Qui diront qu’il n’est loi tenable
Fors l’évangile pardurable
Que li Sains-Esperiz envoie
Por metre gens en bonne voie.
Par la force Jehan entent
La grâce dont se va vantant
Qui vuet peschéors convertir
Por eus faire à Dieu revertir.
Moult i a d’autres déablies
Commandées et establies
En ce livre que ge vous nomme
Qui sunt contre la loi de Romme,
Et se tiennent à Ante-Christ,
Si cum ge truis ou livre escript.
Lors commanderont à occierre
Tous ceus de la partie Pierre ;
Mès jà n’auront pooir d’abatre,
Ne por occire, ne por batre,
La loi Pierres, ce vous plevis,
Qu’il n’en demore assés de vis
Qui tous jors si la maintendront
Que tuit en la fin i vendront,
Et sera la loi confondue
Qui par Jehan est entendue.