Li siècle si bon com il fist
El tens que fu sà en arrière,
En toute France ne choisist
Maison d’ordre où il se rendist,
Car li siècles est trop trichierre
Et la gent fausse et losangière ;
Meismes tuit li baron tel sont
Qui doivent gouverner le mont ;
Tuit vivent de rapinerie,
Chascuns tout honor relanquist.
Je ne sai que dire on en puist :
Tuit sont torné à vilénie.
Bon feroit changier sa manière
Et issir de l’orde poudrière :
Tant grate chièvre que mal gist.
Je me rendisse tempre ou tart,
Pour sauver m’âme aucune part,
Dedens une noire abeye,
Car se ma langue frit et art
Et jou ai pensée et resgart
A folour ou à lécherie,
Et je vest robe mal taillie
Et ma teste est haut reoingnie,
Dont samblerai double musart.
Ci ain miex ci faire folie
Et là où ele n’afiert mie :
Tex se quide chaufer qu’il s’art.
Se l’ordre de Prémonstré prent,
il me samble trop bone gent :
Or otroit Dex que il le soient.
Tuit sont blanc vestu par couvent,
Mais lor abbé changent souvent :
Kant en ont fait, tost le renvoient.
Ne cuit que jà des lor me voient,
Me autrement ne me conjoient ;
Comme il se paissent en couvent
De vin et char m’abandonnoient,
Einsi de moi joïr porroient.
Envis laist-on çou c’on aprent.
un proverbe, (Voyez, sur le Rois de Cambray, Arthur Dinaux, Trouvères, Jongleurs et Menestrels cambrésiens, page 1888.)
