Diex l’avoit iluec amenée.
Ne voloit que plus fust celée ;
Descouvrir li vout le trésor,
Et bien estoit reson dès or.
Quant li preudom vit la figure
Vers li s’en va grant aléure.
Mult fu cèle de joie plaine
Quant ele ot véu forme humaine,
Nequedent ele fu honteuse.
De fuir ne fu péreceuse :
Mult s’enfui isnèlement,
Et cil la suit apertement,
Cui no paroit point de viellèce,
De faintise ne de perèce.
Celui coroit tant à esfors[1],
Et si n’estoit-il guères fors.
Sovent l’apele et dist : « Amie,
Por Dieu, quar ne me fètes mie
Corre après vous ne moi lasser,
Quar foibles sui, ne pui passer.
Je te conjur de Dieu le roi
Que en ton cors metes aroi.
Briefment le conjur par celui
Qui refuser ne set nului,
Par qui li tiens cors est desers
Et si brullés par ces désers,
De qui tu le pardon atens,
Que tu m’escoute et si m’entens. »
- ↑ Ms. 7633. Var. Ainz corroit à mout grant effort.
