Touz li païs en croule et bruit :
En noise faire se déportent.
Lor seingnor mainnent et comportent
Et plus qu’orages vont bruiant.
Mout tost s’en fust tornez fuiant
Théophilus, se il osast[1],
Por le Juis qui ne l’ chosast.
Emni euz toz voit un déable
Si grant et si espoentable[2]
Qu’à son semblant bien tel sembler
Terres doie faire trambler :
Des autres est princes et sire.
Théophilus ne set que dire ;
Moult pou s’en faut[3] qu’il n’ist du sens,
Tant voit d’anemis en toz sens,
Nus n’en sauroit dire le nombre.
Bien aura tressailli son ombre
S’il n’ist du sens ainz qu’il s’en tort ;
Mès n’a pooir qu’il s’en destort,
Car li Juis, qui moult s’en peinne,
Entr’aus le trait à quelque paine[4],
Et bien li dist qu’il ne se saint
Ne ne reclaint sainte ne saint.
Quant l’a véu li anemis
Au Juis dist : « Di-moi, amis,
Qui est cis hom ne dont vient-il ? »
— « Sire, fait li lerres, c’est cil
De cui prié tant vos avoie ;
Il est entrez en bone voie
Se vos le volez avoier.
Biau sire, dit li avoie hier
Qu’anuit à vos ci l’amenroie
Et que de lui vos prieroie.
Grant mestier a de vos conseil,
- ↑ Mss. 2710, 7306 du fonds de La Vallière et de l’Arsenal. Var.
Lor maistre et lor signor comportent,
Chandelabres et cierges portent
Et blans mantiaus ont affublez.
Lors fust volentiers reculez
Dans Théophilus, s’il osast, etc. - ↑ Ms. 7987. Var. Resplendissable.
- ↑ Ms. 2710. Var. Moult s’en va près.
- ↑ Ce vers n’est pas dans le Ms. du fonds de Saint-Germain.
