Cele qui est la droite voie[1]
Qui touz les dévoiez r’avoie,
Cele qui est touz li confors
De touz floibes et de toz fors,
Cele qui tant est clère et fine
Que ciel et terre r’enlumine[2],
Cele qui est de si haut estre
Que du ciel est porte et fenestre,
Cele qui est tant débonère
C’on ne l’ puet dire ne retrère,
Cele qui est plus enmieslée
Que noviaux miel en fresche rée,
Quant voit le las qui s’umelie,
Qui tant l’apele et tant la prie,
Qui tant gémist et qui tant plore,
De lui s’aproche sanz demore,
Et si li dist trop doucement :
« Irée m’as trop durement,
Mès tante lerme en as plorée,
Et m’ymage as tant aorée
Que touz li cuers de toi m’apite.
Por ce que tant par est parfite
Et tant vraie ta repentance
Et qu’an moi as tele fiance,
A mon doulz Fiuz ta pès querrai,
Et à ses piez ainz en cherrai
Que tes péchiez ne te pardoingne,
Et que sa grâce ne te doingne[3],
Mès ançois veil sans délaiance
Oïr ta foi et ta créance.
Dont ne croiz-tu sanz nul obstacle
Que cil qui fist son habitacle
En mes costez et en mes flans
Fu Dieux et est et iert toz tens ?
Dont ne croi-tu bien fermement
Que cil qui fist le firmament,
Et de nient le monde cria,
Por home tant s’umilia
Page:Rutebeuf - Oeuvres complètes, recueillies par Jubinal, tome II, 1839.djvu/309
Le texte de cette page a été corrigé et est conforme au fac-similé.
302
NOTES
