Que char et sanc volt en moi prendre,
Et que le cuer par ot si tendre,
Et tant fu douz et tant humains,
Qu’il estandi et piez et meins
En croiz por rachaster le monde ?
Dont ne crois-tu que la sainte onde,
La seinte eue et li saint sans
Qui dégouta de ses seins flans
De mort d’enfer te rachata ? »
Théophilus luès se geta
Tot plorant as piedz Nostre-Dame :
« Je croi, fet-il, de cuer et d’âme,
Douce Dame, quanque vos dites.
Bien croi que li Saint-Espérites
En voz sains flans le Roi conçut
Qui mort en crois por nos reçut.
Bien sai et croi, s’ai grant reson,
Qu’il fu vrais Dieux et verais hon.
Il fu humains, il fu célestres ;
En croiz morut com hon terrestres,
En croiz morut l’umanitez ;
Mès au tiers jor la déitez
L’umanité resçucita,
Et ses amis d’enfer geta.
Bien croi sa ressurrection,
Bien croi sa seinte asscencion,
Bien croi et sai certainement
Qu’il revendra au jugement
Et jugera et morz et vis.
Qui ce ne croist, il m’est avis
Qu’il ne pouroit mie saus estre.
Bien croi en l’haut Seingnor célestre,
Bien croi de vrai cuer et de fin
Qu’il règne et régnera sans fin ;
Bien croi et sai, estoile clère,
Qu’il volt de toi faire sa mère ;
Bien sai et croi, quiex que je soie,
Que ta volanté est la soie
Et que la seue est la teue.
Haute pucele douce et pieue,
Bien croi et sai de cuer et d’âme
Que de l’ ciel iez Royne et Dame[1].
- ↑ Ce vers manque au Ms. 1672
