M’âme et mon cors met en tes meins. »
La seinte Dame espéritable,
La débonère, l’amiable,
Quant voit le las qui merci crie
Et qui tant doucement la prie,
Respondu l’a mult doucement,
Et si li dist mult lieément :
« Théophilé, Théophilé,
Or ont déable tout filé,
Or ont déable tot perdu,
Or sont-il mat et esperdu
Quant reconnois d’entier corage
Le Roi qui te fist à s’ymage.
Bien as déable decéu
Quant mon Fil as reconnéu
Que renoié por lui avoies.
Tu es entré en bone voies
Quant ton péchié as tant ploré,
Et tant veillié et tant oré.
Tant m’as prié et tant requise
Que grant pitié de toi m’est prise.
Ma douçor m’as tant recordée
Qu’à toi sui toute racordée,
Et si ferai toute t’acorde
Au doux Roi de miséricorde. »
A tant de lui s’est départie
Nostre Dame seinte Marie.
Théophilus, qui mult fu liez,
Iij. jors adez agenoilliez
Dedens le temple demora.
Adès gémi, adès oura ;
Onques n’i manja ne ne but,
N’onques du temple ne se mut.
Tant par ot grant dévocion,
Et tant ot grant contricion,
Et de lermes tele habondance
Qu’anviron lui tout sanz dotance,
Se l’escripture ne me ment,
Arousa tout le pavement.
En chaudes lermes fondi toz,
Et fu toujorz à nuz genoz
Devant l’ymage Nostre-Dame.
Page:Rutebeuf - Oeuvres complètes, recueillies par Jubinal, tome II, 1839.djvu/312
Le texte de cette page a été corrigé et est conforme au fac-similé.
305
ET ÉCLAIRCISSEMENTS.
