Pour sa très grant humilité
Ne fit pour sa virginité.
Humilité, quant ele est fine,
Touz biens esclère et enlumine ;
Nule vertuz n’eime Dieu plus.
Tant com detint Téophillus
Humilité dedenz son cuer
Ne l’ pot déables à nul fuer,
Tant le séust bien espier,
Ne decevoir, ne conchier ;
Mès erramment qu’il la baissa[1]
Tost le vainqui, tot le plessa,
Tost l’ot lassé et amati,
Et en son cuer luès li flati
Orgueil, envie et vaine gloire,
Par coi renoier et mescroire
Li fit Jhésu-Crist et sa mère.
Tant somes de povre matère
Que fox est qui en lui se fie
N’en sa bonté se glorefie.
Tant est nostre matère mate
Qu’anemis tot nos vaint et mate ;
Moult erramment les piez nos glace,
Se Dieux ne nos tient par sa grâce,
Quant annemis .i. poi nos bote ;
Pour çou est faus, ce n’est pas dote,
Et trop a fole entencion
Qui por sa grant relegion
Monte en orgueil n’en vaine glore ;
Car, au tesmoing de saint Gringoire,
N’est nus, tant soit de grant povoir,
S’il n’est chéuz, ne puist chéoir.
I. bien preudon est tost chéuz ;
Pour est-il soz et durféuz
Qui pour bonté qu’il ait en lui
Est fier n’orgueilleux vers nului ;
Car à la foiz est avenu
Que bon mauvès sont devenu,
Et à la foiz par Dieu r’avient
Que li mauvès moult bon devient.
Pour ce est foz qui nului despise,
Car Dieux humble péchéour prise
- ↑ Ms. 2710. Var. Laissa.
