Page:Rutebeuf - Oeuvres complètes, recueillies par Jubinal, tome II, 1839.djvu/463

456

ADDITIONS.

si nous faissons asavoir qu’en la nostre tierre naissent li olifant et autres manières de biestes que vous n’avez mie, ki sont apielées niorictore, madarche, thodomaire, dromadaire, camel blanc, leu blanc, qui prendent les chiers et les bises sauvages, et lions de .iij. manières, noir, rous, gouté de taches divierses ; et si sont ausi grant com bugle. Et si avons bugles sauvages d’autres coulours, et moult d’autres biestes que vous n’avés mie, si com dit nous est ; si avons oisiaus ki ont à non grif, ki sont de si grant vertu qu’il portent bien .i. buef tout vif à leur féons ; et ces manières de bestes n’issent pas des désiers por qu’eles i truissent à mangier. Et si avons autres oissiaus c’on apelle alérions : icil a signourie sour tous les oissiaus dou monde. S’est sa coulours samblans à feu ; s’a eles trenchans com rasoirs, et petit est plus grans d’un aigle, ne en tout le monde n’en a que une paire. Si avons apriès coument il naissent ; dont nous vous faisons asavoir que quant li paire a vescut .xl. ans, lors font deus oes et si les ceuvent par l’espasse de .xl. jours ; et quant li .xl. jor sont passé, s’escloent et font .ij. poucins. Quant li pères et li mère les voient, si s’en tornent fuiant au plus tost que il puéent voler ; et li autre oisiel de la contrée s’acompagnent avoec aus dusqu’à la mer. Lors se plongent ens et si se noient, et li autre oisiel s’en retournent à leur aire et as poucins ; si les gardent et nourrissent par quarante jours. Adont sont li poucin dru, si s’en volent, et li autre oissiel se départent, et ensi se départent li alérion. Si vous faissons asavoir que nous avons une autre manière de biestes ki ont à non tygres, et si sont menours d’olifans, et si deveurent moult d’autres biestes. Si vous faissons asavoir qu’en l’une partie d’Inde désierte avons-nous houmes cornus, et autres gens ki n’ont c’un oel, et gens ki ont ieux et