désiert, encontre la mer arenouse, a une manière de gens ki ont les piés reons ausi coume kamel, et la réondecce des piés a .iij. coutes d’entoure ; et si sont dou tout à nostre coumandement. Nequedent il ne sont mie gent d’armes, mais il sont boin laboureur de tierres ; et nule gent ne puéent entrer en leurs tierres, fors nous, qui gardons les entrées et les issues ; et pour çou en avons-nous tréu cescun an quant nous ne leur faisons guerre. Et de l’autre partie dou désiert est une tierre que on apiele Femmenie, en laquele nus hom ne puet vivre .i. seul an ; et cele tierre est moult grans, car ele dure .l. journées de lonc et autretant de let ; et en cele tiere a .iij. roïnes, sans les autres dames ki tienent leur viles et leur castiaus. Dont nos vous faissons assavoir que quant ces dames voelent cevaucier sour leur anemis, eles mainent bien .c. mile dames de pris à ceval et à armes, sans celes ki vont entour le harnois et le viande.
Apriès, nous vous faissons asavoir que nostre tiere est avirounée d’un flun c’on apiele Syson, ki vient de paradis ; el tant est grans c’on ne le passe s’à nef non ; et outre cel flun, est une tiere Pinçonie, et en cele tiere habitent gent ki sont ausi grant com enfant de .vi. ans ou de .vij, et ont chevaus si petis coume moutons ; et sont crestiien ; et nus ne leur fait guerre ne mal, fors une manière d’oissiaus ki vienent cescun an sour aus quant il doivent messouner ou vendengier. Adont vient li rois contre ces oisiaus en bataille, et li oisiel ne s’en voelent aler, devant qu’il en aient fait grant mortalité de celle génération ; et ceste pestillense leur doune nostre Sires pour les péchiés que leur ancisseur fisent.
Apriès nous vous faissons asavoir que là, priès de nous, a Sarrasins ki sont de la çainture en amont houme et par de-
