sous chevaux[1], et portent ars et mainent ès désiers ; et priès de leur marche sont homme sauvaghe, et n’issent onques des désiers, car il ne plest à Dieu, ains gisent sour les arbres pour les sierpens ; et cil houme sauvage guerroient les saitaires et li saitaire aus. Et si faissons prendre à nos hommes ces houmes sauvages par engien ; si les faissons garder en nostre court pour l’esgart des estranges gens. Et si avons une manière de biestes ki ont à non unicornes, ki ont une corne enmi le front, de la longour d’un brac ; s’en i a de .iij. coulours : rouges, blances et noires ; mais les blanches sont plus fors que les autres, car eles se combatent au lion ; et li lions l’ocist par une manière que jou vos dirai ; quar quant li bataille doit i estre, si va li lions selonc .i. arbre fort et grant, et quant l’unicorne le quide férir, li lions guencist, et il fiert se corne en l’arbre, si qu’il ne l’ puet avoir ne retraire, et li lions l’ocist, et li unicorne lui partout où li arbre ne sont. Et si sont priès de nous gaiant ki soloient avoir en l’anchien tans .xl. coutes de haut ; or n’en ont que .xv ; mais il ne puéent issir des désiers s’il n’en issent par nous, et sont à no voloir toutes les fois qu’il nous plaist. Si avons encore une autre manière d’oissiaus ki ont à non fénix, et saciés qu’il est trop plus biaus qu’autres oissiaus, et la plume ne puet ardoir ni empirier ; et nus oissiaus ne le puet prendre, fors que li faucons. Si avons biestes et oissiaus trop que vous n’avés mie, si com dit nous est. Si vos faissons asavoir que l’une de nos Indes est si nette k’il n’i a ne vièr ne sierpent, et keurt uns fluns parmi ki est apielés Ydoines ; si se départ en .vij.
- ↑ Voyez, 1er volume, page 473, ce qui a rapport à Herbelin de Saint-Pol.
