Page:Rutebeuf - Oeuvres complètes, recueillies par Jubinal, tome II, 1839.djvu/471

464

ADDITIONS.

nous alons en bataille encontre nous anemis, nous faissons porter devant nous .xiiij. crois d’or en lieu de gonfanons, et ensegnes longues et lées et aournées d’or et de pierres précieuses. Pour chou le faissons, que nous aions mieux en ramenbranche la passion Jhésu-Crist ; et li autre roi et li autre conte qui vienent en nostre ost portent enseignes de pierces et de cendaus, teles coume cascuns les doit porter endroit soi. Quant nous alons en bataille, devant nous vont .xxx. mile ki sont clerc et chevalier, et .c. mil siergans, sans les autres cevaliers ki vont avoec les karaites, avoec les viandes, avoec les olifans ; et ceste gent sont de nostre propre court et de nostre loi ; mais il font bien nostre coumandement et nostre volonté ; et quant nos volons, nous les faissons bien tous venir en nostre besogne, ou .xx. ou .xxx. des jens que nous mieux amons ; et quant nous allons en bataille, nous commandons nostre tierre as .ij. patriarches de mon signor saint Thumas, ki le gardent ; et quant nous cevauçons simplement par la tierre ki est nostre, nous faissons devant nous porter une crois ki est de fust, ne n’est aournée d’or ne de pierres précieuses, pour avoir boine ramenbrance de Jhésu-Crist ; et en cascune chité de nostre empire a ij. crois à l’entrée ; et desus la crois n’a point d’arc volu, pour çou que chil ki vont par desous l’enclinent, que nous l’avons en tele ramenbrance que nous ne volons que nule riens soit pardesus ki ne soit bénéoite ou sacrée ; et quant nous entrons en la chité, nous faissons porter devant nous .i. vaissiel plain de tiere, pour chou que nous aions tousjours en ramenbrance que de tiere soumes et en tierre revenrons ; et par çou nous est demonstré que nous soiiens humle. Et faissons encore porter devant nous .i. autre vaissiel d’argent ki est plains d’or, pour chou