clers ; et pour chou que li nons est si haus, sui-jou apielés Priestres-Jehans ; et cil ki gardent nos castiaus sont évesque et roi, et nostre mestres ki nous ordene est arcevesques et rois ; et saciés que nous avons la couronne de l’empire par yretage ; et se nous n’avions oir, uns des patriacles saint Thumas seroit rois et aroit la couronne ; et pour çou que tant noble baron siervent et demeurent en nostre court, il nous convient moult douner et despendre. Et sachiés que au chief de .vij. ans a .i. concille à saint Thumas en la chité, et i fait corporelment prédication au peule ; et toutes les piersounes que nous i mandons i vienent au concille, et i demeurent puis que nous i soumes asamblet .ij. mois, et cil à qui nous dounons congiet s’en vont, et li autre s’en vienent od nous en nostre chité.
Apriès nous vous dissons ke nous avons .i. autre palais ki n’est mie tant grant comme cil de quoi nous vous avons dit devant ; dont jou vous di que vois d’oume vint à mon père, ançois que je fusse nés, ki li dist : « Fai .i. palais pour ton enfant ki est à venir ; car il sera li plus grans rois crestiens des autres rois ; et cil palais aura tele viertu de Dieu que ki sera dedens il ne finera jà tandis com il i soit ; et se aucuns i entre ki ait fain, il sera ausi raemplis coume s’il avoit assés mangiet. » Issi fu parlet à mon père, et quant mes pères s’esveilla il fu moult esbahis de la vois k’il avoit oïe, et tantost coumanda que li palais fust commenciés et que li ouvrier i fusent mis ; et si fust labourés par defors de cristal, et li palais par dedens de pieres précieuses labourées à or, et desus labourées de saphirs en samblance de ciel et de toupasses en manière d’estoiles, et li pavemens de cristal ; et li palais est soustenus par .l. coulombes d’or, et en chascun angle de nostre palais siet une coulombe de .lx. coutés,
