Page:Rutebeuf - Oeuvres complètes, recueillies par Jubinal, tome II, 1839.djvu/480

473

ADDITIONS.

Je croi, plus que nule du monde.
Corone ot bele ou chief assise
Qui li sist bien à grant devise.
Son non enquis en tel manière :
« Je vous pri, douce dame chière,
Que me diez de vous le non. »
— « Sire, fist-ele, mon renon
Fu jadis chiéri et amé ;
Mon non est Larguece clamé. »
De l’autre orrez jà la manière :
Ele ot forme et grande plenière ;
Noire estoit et descolorée,
Fade en tout, et fu afublée
D’une robe de vert esreuse ;
A véir fu pou déliteuse :
D’une vielle pane forrée
De menu vair entrepelée.
Tenues levres et bouche auquaise
Ot ; je ne sai se’l’ fu pusnaise ;
Ou nez ot estroites narrines
Qu’ele ot gresle et lonc et verrines ;
Les vaines parmi son visage
Qu’ele ot traitis à grant outrage,
Le col ot lonc, nervu et gresle,
Noirs cheveus dont l’un l’autre mesle ;
Si ot granz mains et longue brache
Dont el tient fort cels qu’ele embrache.
Corone ot d’or trop merveilleuse,
Mainte pierre i ot précieuse ;
Ele ot noirs iex, feus et poingnanz,
A regarder mult resoingnanz.
Quant je l’oi grant pose esgardée
Et sa contenance avisée,
Si enquis ma dame Larguece
Qui estoit cele déablesse.
El me dist c’estoit Avarisce,
Qui périst chascun par son visce.
« Poi s’en faut, bien le puis savoir,