Page:Rutebeuf - Oeuvres complètes, recueillies par Jubinal, tome II, 1839.djvu/482

475

ADDITIONS.

Se j’ai ma robe .i. an portée,
Que je l’aie por ce donée ?
J’ai robes de maintes manières,
Les unes des autres plus chières :
Saches jà nule n’en donrai
Fors tout le mains que je porrai.
N’ai pas honte se je ’s faz vendre,
Quant j’en puis de granz deniers prendre.
Si n’ai cure de feste fère :
Jà ne m’ert bel d’avoir repère,
Ne mès de cels où je cuit prendre.
Ainsi sai-je mes genz aprendre.
Ma gent est riche et honorée,
La teue est povre et endetée :
Aus miens empruntent à usure :
En toz tens povretez lor dure. »
— « Certes, dist Larguesce, mauvaise,
Se ma gent sovent ont mésaise,
Ce fet honor que il maintienent
Et le grant fez que il soustienent
Par débonère cortoisie
Qu’il ameront toute lor vie.
Les miens sont plains de grant bonté :
Jà des tueus n’est conte conté,
Qui en voudra fère voir conte,
Fors de mauvestié et de honte.
Diex te het, je ne le dout mie,
Et toz cels de ta seignorie.
Li mauvès sont en ton hommage ;
Vilonie i est et Outrage,
Et Covoitise l’envieuse,
Et Usure aussi l’outrageuse.
Orguel si est de ta tenance ;
En ton ostel a grant puissance :
Il le conduist et le mestrie.
Grant mestresse i r’est Tricherie :
Mult het Jhésu-Crist ceste herde.
Tu es roïne de la merde ;