Page:Rutebeuf - Oeuvres complètes, recueillies par Jubinal, tome II, 1839.djvu/490

483

ADDITIONS.

Cele qui plus s’orgueille et qui plus se desroie,
Qu’il sanble chastelaine de Péronne ou de Roie,
Ne li chaut qui el mate ou enprent ou enroie
Por .i. taissu d’argent ou por une corroie.

Jà preudom n’ert de feme amez ne chier tenuz
S’il n’est vestuz de vert ou d’escuriex menuz :
Feme ne fait force s’il est povres et nuz ;
Mais qu’il doint largement, il sera bien venuz.

Cele qui plus sera bele, gente de chière,
Qui plus vos sanblera estre orgueilleuse et fière,
Certes c’est la plus vix et si est la meins chière,
Qu’ele bée au gaaig, ne li chaut qui la fière.

Fox est qui à tel feme solace ne déporte,
Que nus à lor chasteax ne vient qu’il ne resorte ;
Et s’il i met sa lance, puis qu’il passe la porte,
Tant ne li metra droite, ne l’en retraie torte.

Jà por bel chapeau d’or, por orel, por crespine,
Ne por guimple de soie atachie à l’espigne,
Por qu’on lor doint beau don, tant connois lor covine,
Ne li chalt desoz qui el se jise souvine.

Tant vos di-ge des femes, bien le sachiez sanz doute :
Feme ne crient mais honte, feme péchiez ne doute ;
Quar por deniers se prent au poior de la route,
Tant est du gaaignier et covoiteuse et gloute.

Feme a plus d’acointance que mareschal qui ferre
A toz ces chevaliers qui vont errant par terre :
Pris, hennor et renom vont porchaçant et querre
Par toz les leus du mont où sevent point de guerre.

Ausi comme l’en dit : « Cist est bon, cist est beax,
Cil porte l’escu point, cil le porte à labeax,