Ge n’ai mie merveille s’à povre feme avient
Qu’ele face folie au siècle, se devient
Ses estovoirs li faillent ; ne jamais se devient
A cel point n’avenra : bien faire li convient.
Feme qui a de robes ou .v. pères ou .vj.
Forrées d’escurex, ou de vair, ou de gris,
Ou ses beles maisons ou son riche porpris,
L’en la doit bien huer quant ele s’est porpris.
Mult en i a de celes qui f… por looier,
Por les dons qu’en reçoivent, et si n’en ont mestier ;
Mais el siècle n’a nul borjois ne chevalier,
Puisqu’il lice cel livre, ne s’en puist chastoier.
La feme tient bien l’ome por fol et por musart
Qui bien l’aime et amie et atret à sa part ;
Tant com a à doner les lobe par son art,
Et quant n’a mais qu’ampanre, se l’ commande à la hart.
S’ele vest escarlate vermeille ou paonace,
Estanfort ou brunete, et cointement se lace,
S’ele velt gaaignier, poi li est qui li face ;
Ençois l’en set bon gré, à gaig li porchace.
Feme fait bele chière, douce, piteuse et tenre
Au riche home où el cuide où il ait riens à penre ;
Le povre boute arrière por ce qu’il n’a que tenre.
Feme set trop de mal qui ses chières avenre.
Feme qui vent sa chière au déable la quit ;
Trop a le cuer félon, au déable la quit.
S’il avient qu’ele face bele chière, ce cuit,
Por une sole bele en fait .xxx. d’aquit.
Tant a mal cuer en feme que ce n’est mie gieux ;
Feme est de toz biens vuide ausi com li jagleux :
