ter noz oblations & offrandes. Puis le sacrifice achevé saillismes du temple par une autre porte qui nous mena en une campagne couverte de prez merueilleusement delectables, lesquelz (a mon iugement) n’avoyent encores esté brouttez de moutons ou de chievres, ny foulez, d’autres piedz que de Nymphes. Et pense que les mouches a miel n’en avoient encores gousté de la saveur des fleurs : tant elles se monstroient saines & entieres. En ces prez nous apperceusmes une troupe de bergieres qui s’en alloient promenant le petit pas, en faisant des chapelletz, qu’elles affuloyent en mille modes sus leurs chevelures blondes, chascune s’efforceant de surmonter par artifice ses dons de nature. Entre lesquelles Galicio choysissant (de fortune) sa mieux aymée, sans se faire prier aucunement, apres avoir getté quelques souspirs du fons de sa poyctrine, sonnant Eugenio de sa musette, ainsi commencea doucement a chanter, chascun faisant silence.
A u rivage d’un ruysseau
D’ argentine & courante eau,
