Party de Cyrus. je ne penſe pourtant pas que vous nous blaſmiez : car je croy que pour mettre ſa perſonne en ſeureté, & pour delivrer ſa Maiſtresse, il eſt permis de paſſer dans le Party ennemy. Le Prince Mazare entendant parler Andramite de cette ſorte, en fut bien aiſe, parce qu’il vit qu’il avoit une voye d’enveloper ſon changement dans celuy des autres : & qu’il luy ſeroit bien plus aiſé de paſſer du Camp de Creſus à celuy du Party contraire, que s’il euſt eſté ſeul : parce que le Roy de Pont le faiſoit touſjours obſerver avec grand ſoin, tant qu’il eſtoit à Sardis. Apres avoir donc oüy tout ce qu’Andramite avoit à luy dire, qui luy exagera l’injuſtice de Creſus, avec toute la chaleur d’un homme qui mouroit d’envie d’eſtre aupres de la belle Doraliſe : il luy dit que ſes intereſts ſeroient touſjours les ſiens : & qu’il feroit tout ce qu’il luy plairoit qu’il fiſt. Car encore, luy dit il, que vous ayez lieu de croire que je ne dois pas aller trouver Cyrus, apres ce qui s’eſt paſſé, j’ay d’autres raiſons que vous ne sçavez pas, qui feront que je ne laiſſeray pas de le faire : mais il me ſemble que ſi nous pouvions trouver les moyens de delivrer les priſonniers qui ſont icy, nous ſerions mieux reçeus de ce Prince. j’en ay ſans doute une voye aſſez ſeure : touteſfois elle la ſera encore davantage, ſi vous vous joignez à moy. Enfin Madame, que vous diray-je ? Andramite conſentit à ce que mon Maiſtre voulut ; & Beleſis & moy agiſmes ſi bien avec Tegée, que nous miſmes la choſe en eſtat d’eſtre executée la nuit ſuivante. Mais quoy que nous puſſions faire, nous ne puſmes imaginer les voyes de delivrer le Prince Artamas : par ce qu’il avoit ſes Gardes en particulier, avec leſquels ny Tegée, ny nous, n’avions nulle habitude. Et ce qui faiſoit qu’on le gardoit plus exactement que les
