pas aiſé de faire croire à Leoniſe qu’il l’aimoit : joint qu’il avoit une honte eſtrange de ſon inconſtance, & une repugnance horrible à tromper une Perſonne qu’il avoit tant aimée, & qu’il eſtimoit encore tant, malgré ſa nouvelle paſſion. Elle eſtoit pourtant ſi violente, qu’encore qu’il connuſt ſon crime, il ne s’en pouvoit repentir. Il avoit donc l’ame en une aſſiette bien fâcheuſe, & ſes ſentimens eſtoint bien confus & bien embroüillez : mais quelque douleur qu’il euſt, il ne faiſoit point confidence de ſa nouvelle amour, ny à Hermogene, ny à moy : ſe contentant de ſe pleindre à nous des caprices de Cleodore. Cependant cette aimable Fille qui avoit dans le cœur une veritable affection pour Beleſis, ſe repentoit de ce qu’elle avoit fait, voyant qu’il ne revenoit point à elle comme il avoit accouſtumé : de ſorte que toute fiere qu’elle eſtoit, elle ſe reſolut à la premiere occaſion qu’elle en trouveroit, de taſcher de le rapeller. Eſtant donc allée un jour chez la Reine avec ſa Tante, ſans que Leoniſe y fuſt ; le bazard fit qu’il s’y trouva : & qu’il ſe trouva meſme aſſez près d’elle. Cleodore ne l’eut donc pas plus toſt veû : qu’elle voulut luy dire quelque choſe : mais quelque reſolution qu’elle en euſt faite, il luy fut impoſſible de gagner cela ſur elle : & elle creut qu’il ſuffiſoit qu’elle le regardaſt ſans colere, & qu’elle luy reſpondiſt : ſans aigreur s’il luy parloit. D’autre part, Beleſis eſtoit ſi interdit, qu’il ne sçavoit que faire ny que dire : car la veuë de Cleodore luy donna tant de confuſion de ſa foibleſſe, qu’en un inſtant il ſe reſolut d’agir avec elle comme s’il n’euſt point eu d’autre paſſion. C’eſt, diſoit il en luy meſme, tout ce que je puis, &
