Bravard, de la Boyssere ; Pierre Coudert, Antoine Mallapert, de Peyrissange ; Benoict Boyssyère le jeune, de Bar ; Simon de Laubeyresse, dudict Fousson ; Damien Raban et Pierre Roux, du village du Tillieu, qui est tout ce que a dict et, la lecture faicte de sa depposition a persisté et declaré ne scavoir signer.
Et adjoustant à sa depposition, a dict qu’un nommé Jacques, grangier dudict bourg de Dore, a receu un coup de pistollet dans le nez, qu’on dict luy avoit esté tiré par le cappitaine de ladicte compagnie, ce que sçoit pour avoir veu ledict grangier lors de ladicte meslée tout couvert de sang, et depuis scait que ledict grangier s’est faict recoudre le nez. Que ledict Jean revenant du marché d’Ariane, il entendit sonner le tocsin audict bourg de Dore, lequel fit assembler quantité d’habitans, tant dudict Dore que des villages circonvoisins estans de ladicte paroisse, partye venant dudict bourg et desdicts villages, partye venant du marché du bourg d’Arlanc, lesquels s’estoient assemblés entre ledict bourg de Dore et le village de Reyrac, ou il vit les soldats de ladicte recreuë l’espée à la main et desdicts habitans la plus grande partye armés de bastons, fourches de fer et halebardes, et quelques uns des espées, lesquels s’entrebattaient sans scavoir qui avoit commencé la meslée, d’autant qu’il ny estoit pas au commencement et vit à l’instant lesdicts soldats qui se retirerent du costé de St-Victour, ce qui occasionna lesdicts habitans de se retirer chacun en sa maison. Ne cognoist lesdicts soldats et, pour le regard desdicts habitans, ne scaurait les nommer, d’aultant qu’ils estoient en trop grand nombre jusques à six ou sept vingt ou environ, et qu’il n’eut pas le loisir de les distinguer, sinon Titasson, consul dudict Dore, ayant son espée au costé dans le foureau ; que aussy en passant le long dudict Dore, l’appoticaire d’Arlanc, gendre dudict Titasson, son espée au costé et à cheval, que alloit joindre son beau-père, ne l’ayant veu dans la meslée. A ouy dire que le cappitaine fut blessé et son cheval pareillement blessé que depuis mourut à Craponne, comme aussy il y eut deux habitans de la paroisse de Dore, blessés, l’un nommé Pierre Cottin et l’autre nommé Jacques dont il ne scait le surnom qui est dudict bourg de Dore ; qui est tout ce qu’il a dict et, lecture faicte de sa depposition, a dict icelle contenir vérité, y a persisté et déclaré ne scavoir signer.
De Chaulnes.Chevelanges.
